NOTISIA

OSLO – E premio nobel di pas pa e aña aki a bai pa e famoso hóben

Pakistani, aktivista pro derechi di mucha, Malala Yousafzai I e aktivista Indio Kailash Satyarthi ku pa hopi aña a hasi kampaña pro derechonan di mucha na India.
Malala Yousafzai asina a kombertí awe den e persona di mas hóben pa risibí e prestigioso premio nobel di Pas, poniendo e den e mesun grupo ku personanan manera Mama Theresa, Nelson Mandela, Desmond Tutu, Dalai Lama i Martin Luther King jr.

Yousafzai a bira mundialmente famoso na aña 2012 despues ku e grupo Taliban di Pakistan a purba asesin’é. Malala a baha for di konvoi pa e bai skol na momento ku un matón di Taliban a pasa i puntr’é si e ta Malala i despues a tir’é 3 bia. Malala a risibí herida di bala na kabes pero a sobreviví e intento di asesinato.

Ku su 11 aña Malala Yousafzai a skibi relatonan deskribiendo bida di un mucha muhé den su bario na Pakistan ku na e momento ei tabata bou di kontròl di Taliban. E relatonan aki a keda publiká dor di BBC. Despues di esaki New York Times i otro medionan prestigioso a entrevista Malala ku a duna un persepshon nobo den di mucha muhé bou di Taliban (e tempu aki Taliban a prohibí mucha muhé pa bai skol den e área aki).

Ku su 14 aña ya Malala a hala atenshon riba nivel internashonal skibiendo i enkurashando muchanan (spesialmente mucha muhé) pa eksigí nan derechi na edukashon. E popularidat di Malala rápidamente a krese i yega na tal nivel ku Taliban a konsider’é komo un menasa serio pa nan stabilidat polítiko/sosial.

Despues di vários menasa di morto (na su kas, riba Internet i asta den korant) lidernan Taliban a reuní i a disidí ku no a sobra otro opshon ku ta di asesiná Yousafzai. Esaki a  keda konfirmá pa un lider Taliban mes ounke tabatin lidernan Taliban ku a desaprobá di esaki públikamente.

Despues di e intento di Asesinato Malala Yousafzai a rekuperá i a bira mundialmente Famoso ku su kara i istoria aparesiendo práktikamente den tur medio di prensa internashonal. Médikonan i institutonan di rònt mundu a ofresé pa duna asistensia na Yousafzai tantu pa su kondishon médiko komo su kousa sosial.

Yousafzai eventualmente a rekuperá i a bira un aktivista riba nivel global dunando deklarashonnan na Nashonnan Uni i a enkabesá kampañanan mundial pa promové derechinan di mucha, ku énfasis riba derecho di edukashon.

Ku apénas 17 aña di edat, Malala Yousafzai a logra masha hopi pa derechi di mucha riba nivel mundial di tal magnitut ku e lo keda marka pa semper den istoria di humanidat. Pa esaki e komité di premio nobel pa pas a disidí ku ta otorgá e aktivista hóben aki un di e premionan di mas prestigioso na mundu. E premio nobel di Pas.

NEWS POWERED BY:NOTISIA DI MOMENTU FASTER,BETTER NEWS