ALGIERS – Un avion di Air Algérie a disparsé riba desierto di Sahara ku 116 persona na bordo. E avion a Sali Burkina Faso rumbo pa Algeria.
Outoridatnan di Algeria a konfirmá ku a pèrdè kontakto ku e avion 50 minüt despues ku e avion a lanta. Nèt promé ku e avion a disparsé e piloto a tuma kontakto ku un toren di control na Niger indikando ku e ta bai kambia di rumbo debí na mal tempu (posiblemente un tormenta di santu). E avion tabata pasando riba e desierto di Sahara den teritorio di Mali i a disparsé for di radar.
Na bordo di e avion tabatin 110 pasahero i 6 miembro di tripulashon. E minister di asuntunan eksterno di Fransia a konfirmá ku tabatin 51 franses na bordo i ku ta probabel ku e avion a kai. Momentonan despues outoridatnan di Mali a konfirmá ku un helikòpter a mira restunan di e avion i aparentemente tambe resto humano. No tin muchu informashon ainda pero ta hasiendo esfuersonan pa yega na e sitio mas pronto posibel i determiná kiko eksaktamente a pasa.
E insidente aki ta marka e di 3 insidente di aviashon sivil den 1 siman di tempu. Siman pasa 17 di yüli tabata buelo MH17 di Malaisya Airlines ku a Sali Amsterdam rumbo pa Kuala Lumpur, Malasia. Manera ya ta konosí e avion aki a kai den ost di Urkania despues di un impakto di un misil. Tur pasahero i tripulashon a fayesé kousando un krísis internashonal.
Ayera, 23 di yüli, un avion di Transasia di Taiwan a kai ku 58 pasahero i tripulashon na bordo. E avion aki tabata purbando di hasi un aterisahe di emergensia pero a dal den algun edifisio. Mal tempu ta e kousa probabel di e aksidente aki, segun outoridatnan di Taiwan ta informá. 48 persona a fayesé, 10 a sobreviví pero hospitalisá i den kondishonnan severo i 5 persona riba tera tambe a resultá herida