WILLEMSTAD – Manera Minister di Hustisia a anunsiá resientemente Kuerpo Polisial Kòrsou huntu ku diferente otro organisashon hudisial riba nos isla, ta organisando sierto strategianan pa por baha i frena e ola di kriminalidat ku tin riba nos isla.

Relashoná ku e insidente ku a tuma lugá dia 15 di yüli último na Aeropuerto Hato, Minister di Hustisia a disidí ku ta bai kuminsá mesora ku akshonnan ku tabata plania pa kuminsá denter di poko.

E diferente organisashonnan hudisial entre otro, Kmar, Marina, Warda Kosta, Duana, PG, OM, VKC, Departamentu di Hustisia i representante di kompanianan di seguridat a duna di konosé ku nan ta dispuesto pa duna nan sosten pa por logra e meta kual ta un Kòrsou ku ménos kriminalidat.

E plan di urgensia ta hiba e nòmber di ”Ta basta Awor”

Minister di Hustisia a partisipá den su diskurso nashonal ku lo bai tuma medidanan drástiko i ku pueblo lo bai mira i sinti esaki. Polis huntu ku tur e partner nan ariba menshoná lo bai aktua ku man duru i ku firmesa. Tur esaki den kuadro di Lei. E akshonnan lo kuminsá awor i lo dura te ku kuminsamentu di aña 2015.

Pueblo ta bai mira mas blou, bèrdè i maron riba kaya durante oranan di dia i anochi. Ta bai habri un liña di telefon anónimo kaminda esun ku mira òf tende di un delito por mèldu esaki mesora.

Aruba

Aruba tambe ta kompletamente di shòk ku e kantidat di ulandesnan ku a pèrdè nan bida den e aksidente

July 20, 2014 NOTISIA DI MOMENTU CURACAO

ORANJESTAD – Aruba tambe ta kompletamente di shòk ku e kantidat di ulandesnan ku a pèrdè nan bida den e aksidente ku e avion di Malaysia Airlines ku a sali Amsterdam ku destino Kuala Lumpur.

E impase ku a surgi e luna aki entre Gabinete Eman i Gobièrnu Ulandes no ta kita nada dje amor i apresio dje pueblo i su gobernantenan pa pais Ulanda. Momento ku Premier Mike Eman a terminá su wèlga di hamber, un dje promé puntonan ku el a trese padilanti, ta ku Aruba ta konbibí ku Ulanda den e momentonan di tristesa aki.

Despues di a gradisí tur esnan ku durante último dianan a kompañ’é den su lucha, Promé Minister Mike Eman a pidi un minüt di silensio pa rekordá e víktimanan i nan famianan. El a bisa ku “lòs dje polémikanan ku nos por tabatin ku mandatarionan di Ulanda, nos amor pa nos próhimo ta ankrá den nos kurason i diferensia di opinion no ta konta”.

Tambe el a informá ku Gabinete Eman II a manda un karta pa gobièrnu di Ulanda ekspresando kondolensia na e pueblo ulandes. Den e avion tabatin alrededor di 190 ulandes abordo, inkluso dos antiano/arubano.

NEWS

Chikungunya ta yega Colombia

July 20, 2014 NOTISIA DI MOMENTU CURACAO

BOGOTA – Ofisialnan kolombianu ta konfirmá e promé kaso di chinkungunya registrá na e pais.

E sekretaría di salu di departamentu Valle del Cauca (situá den suit-ost di e pais) a konfirmá ku un señora di 71 aña tin chikungunya. E señora lo a kaba di bin di Repúblika Dominikana i lo a pega ku e malesa einan. Alabes e komunikado di e departamento di salubridat di valle del Cauca ta bisa si ku e Sra ta rekuperando poko poko pero sigur.

E kaso ta promé kaso di chikungunya registrá na Colombia, sinembargo ta parse ku e persona no a pega ku e malesa na Colombia. Esaki ta nifiká ku podisé no tin sangura ku ta karga e viro na Colombia ainda. Pero, si tin un persona ku chikungunya, esaki lo por pasa fásilmente.

Chikungunya ta un malesa kousá pa un viro di e mesun nomber. e malesa no ta hopi mortal pero ta sumamente doloroso. Ta un malesa similar na Dengue ku ta keda transmití di mesun manera. Un persona por pega ku e viro/malesa na momento ku un sangura di e famia Aedis (mesun sangura ku por karga Dengue) ku ta kontaminá ku e viro, pika e persona.

Síntoma nan ta doló di kabes, doló di wesu, doló di joint, keintura i rebultashon (kueru). No tin kura, vakuna ni tratamentu pa Chikungunya, pero un persona por rekuperá den masoménos 1 siman di tempu. Sinembargo den algun kaso e síntomanan (spesialmente doló insoportabel den joint) por dura pa simannan i asta lunanan largu.

Chikungunya a keda introdusí den Amérika pa promé bia na desèmber 2013 na St maarten (franses). Den algun luna di tempu e viro a plama pa práktikamente henter Karibe i ya a keda konfirmá na mas di 2 pais den latino Amérika. Segun ekspertonan ya no por para chikungunya mas, ta kuestion di tempu promé ku e presentá den tur pais di Amérika.

Notisia International

Barcelona ta aprobá leinan independista

July 20, 2014 NOTISIA DI MOMENTU CURACAO

BARCELONA – E region di Cataluña (nort di Spaña) a inisiá ku tramitenan legal ku ta habri kaminda pa e region tene un referèndem di independensia.

E gobièrnu regional di Cataluña, situá na e kapital regional Barcelona, a ofresé e gobièrnu di Spaña, na Madrid, pa sinta i negoshá e proseso emansipatorio Catalan. Pero e presidente di gobièrnu di Spaña, Mariano Rajoy, a indiká ku e oferta di diálogo ta karesé di seriedat i ku madrid no tin nada di papia ku Barcelona. Cataluña no por bira independiente, esaki ta bai kontra di e konstitushon di Spaña, Madrid lo no aseptá esaki. Asina e gobièrnu di Rajoy a yega di splika klaramente den pasado. Rajoy a asta menasa di blòkia kualke intento di Cataluña pa drenta den union oropeo.

E region outónomo d Cataluña ta un di e regionnan mas desaroyá di Spaña i komo tal ta haña ku nan lo ta mihó riba nan mes. Spaña ta un di e paisnan oropeo mas afektá pa e krísis di debe oropeo i Barcelona ta kulpa maneho di Madrid pa esaki. Sondeonan a mustra ku tin un sosten amplio pa independensia den e region i polítikonan regional ke tene un referèndem. E region tin su propio gobièrnu, su propio instansianan, su propio parlamento i su propio kultura i identidat, mester respetá e deseo di e pueblo Catalan, asina Artur Mas, presidente di Cataluña a yega di deklará.

Posishon di Madrid a keda mes kos, asta si tene un referèndem mes, ta henter Spaña mester vota, no siudadanonan di 1 region so, Mariano Rajoy, Presidente di Gobièrnu di Spaña ta bisa.